Ռուսական զորքերը հարվածել են Պոլտավային, ինչի հետևանքով զոհվել է 41 մարդ, վիրավորվել՝ ավելի քան 180-ը։ Այս մասին հայտարարել է Ուկրաինայի նախագահ Վլադիմիր Զելենսկին։
Ըստ նրա՝ քաղաքը խոցվել է երկու բալիստիկ հրթիռով։ Նրանք հարվածել են ուսումնական հաստատության և հարակից հիվանդանոցի տարածքին։
Մասամբ ավերվել է Կապի ինստիտուտի շենքերից մեկը: Մարդիկ մնացել են փլատակների տակ:
«Ես հանձնարարել եմ դեպքի բոլոր հանգամանքների լիարժեք և օպերատիվ հետաքննություն անցկացնել։ Փրկարարական աշխատանքներին ներգրավված են բոլոր անհրաժեշտ ծառայությունները»,- գրել է Զելենսկին։
Ուկրաինայի պաշտպանության նախարարությունը հայտնել է, որ հարվածներն իրականացվել են կարճ ընդմիջումով, ուստի մարդիկ չեն հասցրել տեղափոխվել ռմբապաստարան։ Փրկարարների և բժիշկների համակարգված աշխատանքի շնորհիվ փրկվել է 25 մարդ, որոնցից 11-ը դուրս է բերվել փլատակների տակից:
