Հայաստանի վարչապետ Նիկոլ Փաշինյանը հայտարարել է, որ երկիրը ձգտում է ամրապնդել ինքնիշխանությունը՝ արտաքին կապերի դիվերսիֆիկացման և առանձին գործընկերներից կախվածության նվազեցման միջոցով։ Միաժամանակ նա ընդգծել է, որ Եվրամիության հետ մերձեցումը չպետք է հանգեցնի հարևան պետություններից Հայաստանի մեկուսացմանը։
Դրա մասին նա հայտարարել է 2026 թվականի նոյեմբերի 3-ին Բրյուսելում ԵՄ ընդլայնման հարցերով գագաթնաժողովի շրջանակում Euronews-ին տված հարցազրույցում՝ մեկնաբանելով Հայաստանի արտաքին քաղաքական ուղեգիծը և Ռուսաստանի հետ հարաբերությունները։
Վարչապետի ասելով՝ կառավարությունը «հավասարակշռված և հավասարակշռող արտաքին քաղաքականություն» է վարում , որը ենթադրում է տնտեսական և քաղաքական ոլորտներում կապերի դիվերսիֆիկացում։
«Մենք դիվերսիֆիկացնում ենք մեր հարաբերությունները բոլոր ոլորտներում, այդ թվում՝ տնտեսության և քաղաքականության։ Մեր նպատակը ռիսկերը կառավարելն է։ Մեզ համար կարևոր է բացառապես մեկ գործընկերոջից կախված չլինել և հնարավորություն ունենալ ինքնուրույն որոշումներ կայացնելու՝ ելնելով Հայաստանի ազգային շահերից»,- ասել է Փաշինյանը։
Նա պարզաբանել է նաև, թե ինչ է հասկանում երկրի անկախության ամրապնդում ասելով։ Նրա ասելով՝ այս գործընթացը կապված է կախվածության բնույթի փոփոխության և ինքնուրույն ընտրություն կատարելու հնարավորությունների ընդլայնման հետ։
Մեկնաբանելով Ռուսաստանի անվտանգության խորհրդի նախագահի տեղակալ Դմիտրի Մեդվեդևի հայտարարությունն այն մասին, որ Հայաստանը կարող է դառնալ «նոր Ուկրաինա»՝ Փաշինյանը նման արտահայտությունները ոչ կառուցողական է անվանել։
«Հայաստանը կմնա Հայաստան։ Մենք ուզում ենք դառնալ ավելի անկախ, ավելի ինքնիշխան և ավելի ինտեգրված։ Միաժամանակ մեր եվրոպական քաղաքականությունը չի նշանակում, որ մենք պետք է կտրվենք մեր իսկ տարածաշրջանից։ Մենք պետք է զարգացնենք հարաբերությունները եվրոպացի գործընկերների հետ՝ միաժամանակ պահպանելով կապերը հարևանների հետ»,- հայտարարել է նա։
Փաշինյանն անդրադարձել է նաև ԵՄ-ին Հայաստանի անդամակցության հեռանկարներին և Եվրասիական տնտեսական միությանը երկրի ներկայիս մասնակցությանը։ Նա ընդունել է, որ երկարաժամկետ հեռանկարում այս երկու ուղղություններն անհամատեղելի են գործող մաքսային կանոնների շրջանակում, ուստի երկիրն ի վերջո ստիպված կլինի ընտրություն կատարել։
Ըստ նրա՝ կառավարության խնդիրն իրական այլընտրանք ստեղծելն է, իսկ վերջնական որոշումը պետք է արտացոլի Հայաստանի քաղաքացիների կամքը։
Վարչապետն ընդգծել է, որ ինքնիշխանության ամրապնդումն ու եվրոպական ուղղության զարգացումը չպետք է դիտարկվեն որպես տարածաշրջանային համագործակցությունից հրաժարում։
Ըստ նրա՝ Հայաստանն, ընդհակառակը, շահագրգռված է հարևանների հետ կայուն հարաբերություններով և այնպիսի կապերի զարգացմամբ, որոնք թույլ կտան ընդլայնել ինքնուրույն արտաքին և տնտեսական քաղաքականություն վարելու իր հնարավորությունները։