Հոկտեմբերի 29-ի առավոտյան ողբերգական դեպք է տեղի ունեցել Երևանում․ հիվանդանոց է տեղափոխվել մեկ ամսական աղջիկ, սակայն երեխան մահացած է եղել։
Ինչպես հայտնում է ֆոտոլրագրող Գագիկ Շամշյանը, ժամը 06։50-ի սահմաններում ոստիկանության Մալաթիայի բաժնում օպերատիվ տեղեկություն է ստացվել, որ շտապօգնության բժիշկները մահացած երեխա են տեղափոխել Երևանի հիվանդանոցներից մեկը։
Դեպքի վայր մեկնած ոստիկանները պարզել են, որ երեխային հիվանդանոց են տեղափոխել Օհանովի փողոցի տներից մեկից։ Ըստ նախնական տեղեկությունների՝ ժամանած շտապօգնության բժիշկներն արձանագրել են փոքրիկի մահը։
Դեպքի առթիվ կազմված փաստաթղթերը փոխանցվել են Քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժին։ Դեպքի առնչությամբ նախաձեռնվել է քրեական վարույթ՝ սպանության (հանկարծամահության) հատկանիշներով։
Դեպքի հանգամանքները պարզվում են։ Այս պահին երեխայի մահվան պատճառի վերաբերյալ պաշտոնական եզրակացություն չի հրապարակվել։
Past.am-ը կհետևի դեպքի վերաբերյալ պաշտոնական տեղեկությունների հրապարակմանը։