Մոսկվան ահազանգում է․ ՌԴ ԱԳՆ–ն՝ Հայաստանում կատարվողի մասին
Եվրամիությունը տարբեր նախաձեռնությունների և առաջարկների միջոցով փորձում է պառակտել Եվրասիական տնտեսական միության (ԵԱՏՄ) անդամ երկրներին։ Այս մասին «Իզվեստիա»-ին տված հարցազրույցում հայտարարել է Ռուսաստանի փոխարտգործնախարար Ալեքսանդր Պանկինը։
Ռուս պաշտոնյայի խոսքով՝ եվրոպական ներկայացուցիչները տարբեր ձևաչափերով այցելում են ԵԱՏՄ առանձին երկրներ, մասնակցում հանդիպումների և նրանց առաջարկում համագործակցության տարբեր հնարավորություններ։
Պանկինը կարծում է, որ այդ առաջարկների մի մասը կարող է իրականում չիրականացվել և օգտագործվել Ռուսաստանի ու ԵԱՏՄ մյուս երկրների միջև համագործակցությունը թուլացնելու նպատակով։
«ԵՄ-ն իսկապես ջանքեր է գործադրում մեզ բաժանելու և միմյանցից հեռացնելու ուղղությամբ։ Դա փաստ է»,– ասել է Պանկինը՝ ընդգծելով, որ ներկայում գլխավոր խնդիրներից մեկը նման գործընթացներից խուսափելն է։
Ռուս փոխարտգործնախարարը հատկապես անդրադարձել է Հայաստանի դիրքորոշմանը։ Նա նշել է, որ Երևանը շարունակում է խորացնել հարաբերությունները Բրյուսելի հետ՝ հիշեցնելով 2025 թվականին ԵՄ-ին Հայաստանի անդամակցության գործընթացի մեկնարկի մասին օրենքի ընդունումը։
Միևնույն ժամանակ, վարչապետ Նիկոլ Փաշինյանը նախկինում հայտարարել է, որ հասկանում է ԵԱՏՄ-ին և Եվրամիությանը միաժամանակ անդամակցելու անհնարինությունը։ Սակայն Հայաստանի՝ ԵՄ-ին անդամակցելու գործընթացը ներկայում շարունակում է մնալ հայտարարությունների և քաղաքական քննարկումների փուլում։
Օգոստոսի 7-ին Ղրղզստանում կայացած Եվրասիական միջկառավարական խորհրդի նիստում Փաշինյանը հայտնել էր, որ Հայաստանը ի գիտություն է ընդունել ԵԱՏՄ մյուս անդամ երկրների առաջնորդների առաջարկը՝ ԵՄ-ին անդամակցության հարցով հանրաքվե անցկացնելու վերաբերյալ։
