Ո՞ր քաղաքացիները Ռուսաստանը լքելու համար օրենքով կպատժվեն
Ռուսաստանում ուժի մեջ են մտել նոր սահմանափակումներ այն քաղաքացիների նկատմամբ, որոնք գտնվում են արտերկրում և խուսափում են իրենց նկատմամբ նշանակված քրեական պատժի կամ որոշ վարչական տույժերի կատարումից։
Ռուսաստանի Պետդումայի կողմից ընդունված օրենքը նախատեսում է մի շարք ժամանակավոր սահմանափակող միջոցներ։ Դրանք կարող են կիրառվել այն քաղաքացիների նկատմամբ, որոնք դատապարտվել են Ռուսաստանի Քրեական օրենսգրքով նախատեսված հանցագործությունների համար կամ պատասխանատվության են ենթարկվել օրենքով նախատեսված մի շարք վարչական իրավախախտումների շրջանակում։
Սահմանափակումների տակ կարող են հայտնվել, մասնավորապես, բանակը «վարկաբեկելու», «օտարերկրյա գործակալների» մասին օրենսդրությունը խախտելու, «անցանկալի կազմակերպությունների» գործունեությանը մասնակցելու կամ Ռուսաստանի տարածքային ամբողջականության դեմ ուղղված հրապարակային կոչերի համար պատասխանատվության ենթարկված անձինք։
Նոր կարգավորումներով որոշ դեպքերում կարող է սահմանափակվել նրանց հասանելիությունը Ռուսաստանի պետական և արտերկրում հյուպատոսական ծառայություններին։ Նախատեսվում են նաև Ռուսաստանի տարածքում գտնվող անշարժ գույքի և տրանսպորտային միջոցների վաճառքի սահմանափակումներ, ինչպես նաև բանկային հաշիվների և բանկային հավելվածների օգտագործման սահմանափակումներ։
Միաժամանակ օրենքը չի վերաբերում պարզապես Ռուսաստանից հեռացած բոլոր քաղաքացիներին։ Սահմանափակումների կիրառման համար անհրաժեշտ են օրենքով նախատեսված իրավական հիմքեր։
Օրենքի ընդունման մասին հաղորդագրության համաձայն՝ այն նպատակ ունի ապահովել այն քաղաքացիների նկատմամբ սահմանված պատժի կատարումը, որոնք գտնվում են Ռուսաստանից դուրս և խուսափում են պատասխանատվությունից։
Աղբյուր՝ ՌԴ Պետդումա