Մերձավոր Արևելքից վերադարձած ՀՀ քաղաքացիների տոմսերի գումարը կվճարի պետությունը

Իրանի շուրջ ստեղծված իրավիճակի հետևանքով Մերձավոր Արևելքից և Հնդկաստանից վերադարձած ՀՀ քաղաքացիները վերադարձի տոմսերի փոխհատուցման շուրջ 500 հայտ են ներկայացրել ԱԳՆ: Այս մասին նշված է ՀՀ արտաքին գործերի նախարարության ներկայացրած նախագծում, որը հաստատվեց ՀՀ կառավարության այսօրվա նիստի ժամանակ:

Ստացվել են ինչպես անհատական, այնպես էլ ընտանեկան հայտեր։ Նախնական հաշվարկով՝ փոխհատուցման համար կարող է պահանջվել շուրջ 450 մլն դրամ։

ԱԳՆ–ից նշել են, որ դիմումների մի մասն արդեն հաստատվել է, և քաղաքացիները սպասում են վճարումներին, մյուս մասը քննարկման փուլում է։

Ավելի վաղ նշվել էր, որ մինչև 250 հազար դրամ փոխհատուցում կվճարվի այն քաղաքացիներին, որոնք հակամարտության պատճառով ստիպված են եղել վերադարձի տոմսերը ձեռք բերել բարձր գնով: Վճարումը կատարվում է միայն այն դեպքում, եթե ուղևորը ավիաընկերությունից փոխհատուցում չի ստացել:

Տոմսերի փոխհատուցումը նախատեսված է նաև ԱՄԷ–ում, Կատարում, Քուվեյթում և Իսրայելում ուսում ստացած ուսանողների համար:
Փոխհատուցում ստանալու համար կարելի է դիմել e-request.am պետական հարթակով` կցելով անհրաժեշտ փաստաթղթերը, այդ թվում` ավիատոմսը։