Ռուսաստանի նախագահ Վլադիմիր Պուտինը պաշտոնական այցով գտնվում է Չինաստանում, որտեղ նրան Պեկինի Տյանանմեն հրապարակում դիմավորել է Չինաստանի նախագահ Սի Ծինփինը։ Առաջնորդները մասնակցել են պաշտոնական արարողությանը, ձեռքսեղմվել և լուսանկարվել։ Պուտինին դիմավորել են նաև պատվո պահակախումբն ու նվագախումբը։
Հանդիպման ընթացքում Պուտինը Սի Ծինփինին հրավիրել է 2027 թվականին այցելել Ռուսաստան և նրան անվանել «սիրելի ընկեր»։
Կողմերը նաև պայմանավորվել են երկարաձգել Չինաստանի և Ռուսաստանի միջև բարիդրացիության, բարեկամության և համագործակցության մասին պայմանագիրը։ Սի Ծինփինի խոսքով՝ որոշումը հաստատվել է երկկողմ հանդիպման ընթացքում։
Միաժամանակ, Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը հայտարարել է, որ այցի շրջանակում Չինաստանի հետ ձեռք են բերվել նոր պայմանավորվածություններ ենթակառուցվածքային, ներդրումային և տիեզերական նախագծերի ոլորտներում։ Նրա խոսքով՝ ռուս-չինական կողմերն արդեն իրականացրել են ավելի քան 50 համատեղ նախագիծ՝ ավելի քան 800 միլիարդ ռուբլու ընդհանուր ներդրումներով։