ՌԴ Անվտանգության խորհրդի քարտուղար Շոյգուն հանդես է եկել ՀՀ-ի մասին հայտարարությամբ
Ռուսաստանի Անվտանգության խորհրդի քարտուղար Սերգեյ Շոյգուն հայտարարել է, որ Հայաստանի իշխանությունները վերջերս մի շարք քայլեր են ձեռնարկել, որոնք անհամատեղելի են Ռուսաստանի հետ համագործակցության ոգու հետ։
«Մեր այսօրվա հանդիպման հիմնական թեման կլինի Հայաստանի Հանրապետության հետ հարաբերությունները։
Գաղտնիք չէ, որ երկրի ղեկավարությունը վերջերս մի շարք քայլեր է ձեռնարկել, որոնք անհամատեղելի են Ռուսաստանի Դաշնության հետ դաշնակցային հարաբերությունների ոգու հետ», – ասել է Շոյգուն Ռուսաստանի Անվտանգության խորհրդի աշխատանքային խմբի նիստում։
Ինչպես նշել է ՌԴ ԱԽ քարտուղարը, միջազգային հարթակներում Հայաստանը պարբերաբար միանում է ԵՄ դիրքորոշումներին, ինչպես նաև ակտիվ աշխատանք է տանում ստանդարտների փոփոխման, ԵՄ-ի հետ մաքսային-առևտրային ռեժիմների համաժամանակեցման ուղղությամբ, ինչը կարող է չհամապատասխանել ԵԱՏՄ շրջանակում Հայաստանի պարտավորություններին:
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ Երևանը խախտել է նախկինում Ռուսաստանի դեմ ուղղված քայլեր չձեռնարկելու իր պարտավորությունները։ Նա ասել էր` այն երկիրը, որին Մոսկվայում բարեկամ էին համարում, ամբիոն տրամադրեց ահաբեկչին՝ նեոնացիստական ռեժիմի պարագլխին։