Հայաստանի օրենսդրությամբ սահմանված կարգով և որպես ժողովրդի մանդատն ունեցող մարդ՝ Ես կոնկրետ անձանց սպառնում եմ, որ նրանք նստելու են, և պետք ա նստեն, իսկ ֆիզիկական սպառնալիքը վերաբերում է մասկեքով խոսացողներին։ Այո՛, դա ֆիզիկական սպառնալիք է, որովհետև մենք նրանց պոլերով ենք տալու։ Այս մասին մայիսի 18-ին, Երևանում նախընտրական քարոզարշավի շրջանակում լրագրողների հետ զրույցում հայտարարել է արձակուրդում գտնվող ՀՀ վարչապետ Նիկոլ Փաշինյանը, ով գլխավորում է երկրում այժմ իշխող «Քաղաքացիական պայմանագիր» կուսակցության պատգամավորության թեկնածուների համամասնական ցուցակը։
Նրա խոսքով՝ ընդդիմադիր ուժերի ներկայացուցիչները քրեական գործերով անցնում են որպես հանցագործությունների մասնակիցներ։ «Էդ ֆիզիկական սպառնալիք կարող է լինի մասկեքով ելույթ ունեցողների համար, որովհետև պոլերով ենք տալու, սատկացնելու ենք։ ԷՆ որ ավտոմատը ուսներին դրած խոսում են ես դրանց հատ-հատ գտնելու եմ ու սատկացնելու եմ։ Մեր իրավապահները ասֆալտ ուտցնելով դրանց տանելու են գցեմ քրեակատարողական հիմնարկներ։ Նման բան ութ տարվա ընթացքում արդեն եղել է բազմաթիվ դրվագներով»,- հավելել է Փաշինյանը։
Նա կրկնել է, որ իշխանությունները կտրել են «մաֆիայի» 23 գլուխներից 20-ը, և մնացել է երեք գլուխ՝ հավելելով, որ մինչև տարեվերջ այդ հարցը նույնպես պետք է լուծվի։ «Ես կնոջը չեմ սպառնացել, ես Ռոբիկին եմ սպառնացել և հիմա էլ սպառնում եմ։ Սատկացնելու եմ։ Եթե կինը իրեն հաշիվ չի տալիս իրեն, որ խոսում է Հայաստանի ժողովրդի ներկայացուցչի հետ, ուրեմն ես էլ խոսում եմ իրա տերերի հետ ու սպառնում եմ։ Ես պատերազմի ժամանակ իմ ընտանիքին չեմ խնայել։ Իմ տղայի հետ նույն խրամատում գտնվող մարդը զոհվել է։ Նրանք, ովքեր ղարաբաղի ակցենտով սպառնալիքներ են ձևակերպում, բոլորը փախածներ են, վախկոտ ստահակներ են բոլորը։ Նրանց մի մասն արդեն դատվում է, և նրանք նույնպես պետք է կանգնեն դատարանի առաջ։
Այն դատաստանի մաֆիաները, որը նրանց անընդհատ ազատ է արձակում… Նրանք, ովքեր բարձունքներ ու դիրքեր են հանձնել, որպեսզի ինձ մեղադրեն ու իշխանափոխություն քննարկեն, թող գլուխները պատովը տան»,- ընդգծել է Փաշինյանը։
Նրա գնահատմամբ՝ Սահմանադրությունը պետք է փոխվի, իսկ դատավորները պետք է ունենան դատավորի կարգավիճակ։ «Նրանց, ովքեր ուզում են ժողովրդավարությունն օգտագործել ժողովրդավարության դեմ, ես իրանց սպառնում եմ։ Ես սպառնում եմ կալուգացի օլիգարխին, Ծառուկյան Գագոյին, Քոչարյան Ռոբերտին ու ոտերի տակ ընկնող Սերժին։ Ես ձեզ սատկացնելու եմ ու ծնկի բերեմ։ Ես ձեզ կզցնելու եմ»,- նշել է Փաշինյանը։
Նա հայտարարել է, որ իր խոսքերի հետ կապված իրավապահներն ու «Քաղաքացիական պայմանագիր» կուսակցությունն անհրաժեշտության դեպքում գնահատական կտան և միջոցներ կձեռնարկեն։
