Գարունը շատերի համար հաճելի եղանակ է, սակայն հազարավոր մարդկանց համար այն նաև ալերգիկ հիվանդությունների սրման շրջան է։ Օդում զգալիորեն ավելանում է ծաղկափոշու քանակը, որը համարվում է սեզոնային ալերգիաների հիմնական պատճառներից մեկը։
Առողջապահության համաշխարհային կազմակերպություն-ի տվյալներով՝ աշխարհում յուրաքանչյուր երրորդ մարդ կյանքի ընթացքում բախվում է ալերգիկ հիվանդությունների, և դրանց տարածվածությունը շարունակում է աճել։
Գարնանային ամենատարածված ալերգիաները
- Ալերգիկ ռինիտ – փռշտոց, քթի քոր, փակվածություն, քթահոսություն
- Ալերգիկ կոնյուկտիվիտ – աչքերի կարմրություն, քոր, արցունքահոսություն
- Բրոնխիալ ասթմա – շնչահեղձություն, սուլոց շնչառություն, երկարատև հազ
- Մաշկային ալերգիաներ – քոր, ցան, եղնջացան, մաշկի գրգռվածություն
Այս ախտանիշները կարող են ազդել քնի, աշխատունակության և ընդհանուր կյանքի որակի վրա։
Երբ ալերգիան դառնում է վտանգավոր
Որոշ դեպքերում ալերգիան կարող է հանգեցնել ծանր վիճակի՝ անաֆիլաքսիայի, որը կարող է կյանքին սպառնալիք լինել։ Վտանգավոր նշաններն են՝
շնչառության դժվարացում, կոկորդի այտուց, գլխապտույտ, գիտակցության կորուստ կամ արյան ճնշման կտրուկ անկում։ Այս դեպքում անհրաժեշտ է անհապաղ դիմել շտապ օգնության։
Ինչպես նվազեցնել ալերգիայի ազդեցությունը
- Խուսափել երկար զբոսանքներից քամոտ ու չոր օրերին
- Տուն մտնելիս փոխել հագուստը և լվացվել
- Երեկոյան լվանալ մազերը՝ ծաղկափոշին հեռացնելու համար
- Օդափոխել տունը անձրևից հետո կամ երեկոյան ժամերին
Ալերգոլոգիայի գծով ԱՆ խորհրդատու Արմինե Հակոբյանը խորհուրդ է տալիս չզբաղվել ինքնաբուժմամբ։
Նրա խոսքով՝ հակաալերգիկ դեղերի սխալ կիրառումը կարող է լինել անարդյունավետ կամ առաջացնել կողմնակի ազդեցություններ։ Ախտանիշների դեպքում անհրաժեշտ է դիմել մասնագետի, քանի որ ճիշտ ընտրված բուժումը թույլ է տալիս վերահսկել հիվանդությունն ու պահպանել ակտիվ կենսակերպ։