Այսօր՝ փետրվարի 21-ին, ավտովթար է տեղի ունեցել Արմավիրի մարզում: Ժամը 14:40-ի սահմաններում էջմիածին-Մարգարա ավտոճանապարհի Ջրարբի գյուղի վարչական տարածքում բախվել են Արմավիրի մարզի բնակիչներ 58-ամյա Հրահատ Խ.-ի վարած «ԳԱԶ 2410» մակնիշի և 24-ամյա էրիկ Գ.-ի վարած Opel մակնիշի ավտոմեքենաները:
Ինչպես հայտնում է ֆոտոլրագրող Գագիկ Շամշյանը, վթարի հետևանքով Opel-ը առաջ է ընթացել և բախվել ճամփեզրին կայանված՝ Կոտայքի մարզի բնակիչ 25-ամյա Վլադիմիր Բ.-ին պատկանող BMW մակնիշի և Արմավիրի մարզի բնակիչ 53-ամյա Տիգրան Տ.-ին պատկանող «ՎԱԶ 21015» մակնիշի ավտոմեքենաներին:
Վթարի հետևանքով վարորդներից Հրահատ Խ.-ն մարմնական վնասվածքներով տեղափոխվել է «Վաղարշապատ» բժշկական կենտրոն:
Վիրավորին առաջինը օգնության են հասել քաղաքացիներն ու օպերատիվորեն ժամանած «Վաղարշապատ» բժշկական կենտրոնի շտապօգնության բժիշկների հերթապահ խումբը:
