Սամվել Կ․-ին մեղադրանք է առաջադրվել այն բանի համար, որ նա, վարելով ավտոմեքենա, խախտել է ճանապարհային երթևեկության կանոնները, որն անզգուշությամբ առաջացրել է անձի մահ։
Այս մասին Iravaban.net-ը տեղեկացավ «Դատալեքս» դատական տեղեկատվական համակարգից։
Գործը դատարան է ստացվել օգոստոսի 4-ին և մակագրվել դատավոր Նապոլեոն Օհանյանին։
Խափանման միջոց է ընտրվել բացակայելու արգելքը։
Նշվում է, որ տղամարդը 2024-ի հունիսի 16-ին սթափ վիճակում վարելով ավտոմեքենան, Կապան-Քաջարան ավտոճանապարհով դեպի Քաջարան տանող ուղղությամբ ընթանալիս՝ հանդիպակաց ուղղությամբ ընթացող ավտոմեքենայի լույսերից շլանալու պահին միջոցներ չի ձեռնարկել իր վարած ավտոմեքենայի ընթացքը դանդաղեցնելու, ընդհուպ մինչև ավտոմեքենան կանգնեցնելու համար։
Տեղի է ունեցել վրաերթ, ինչն անզգուշությամբ առաջացրել է հետիոտն Ռիտա Փ․-ի մահը։
Դատարանը վճռել է Սամվել Կ․-ին մեղավոր ճանաչել Քրեական օրենսգրքով նախատեսված հանցագործության կատարման մեջ և որպես պատիժ նշանակել ազատազրկում 2 տարի ժամկետով։
Պատիժը պայմանականորեն չկիրառել՝ սահմանելով փորձաշրջան 2 տարի ժամկետով, վարքի նկատմամբ վերահսկողությունը դնել ՀՀ արդարադատության նախարարության պրոբացիայի ծառայության վրա։
Դատավճիռը կարող է բողոքարկվել ՀՀ վերաքննիչ քրեական դատարան մեկամսյա ժամկետում։
Դատական ակտը հրապարակվել է օգոստոսի 19-ին։
