ՀՀ նախկին ՊՆ նախարար, գեներալ մայոր Արշակ Կարապետյանը ֆեյսբուքյան իր էջում տեսանյութ է հրապարակել, որում հայտարարել է, որ Արցախում տեղի ունեցած ողբերգական իրադարձությունները Հայաստանի ղեկավարության թուլամորթության և դավաճանության հետևանքն են։ Նա նաև ընդգծել է, որ հեռացվել է ՊՆ նախարարի պաշտոնից, քանի որ ինքը հրաման է տվել կրակ բացել պետական սահմանի խախտման դեպքում։
«Ես նկատի ունեմ դավաճանությունը, որը հանգեցրեց Արցախի պաշտպանության բանակի ոչնչացմանը։ Ինձ հավաստի աղբյուրներից հայտնի է նաև, որ հենց Նիկոլ Փաշինյանն է դիմել ադրբեջանական ղեկավարությանը՝ խնդրելով առևանգել հայ ազգի արժանի զավակ Ռուբեն Վարդանյանին և թույլ չտալ անցնել ՀՀ սահմանը »,- ասել է նա։
Կարապետյանի խոսքով՝ եթե ոչ այսօր, ապա վաղը թշնամին նորից կանցնի հարձակման՝ նրա նպատակն է գրավել Հայաստանը։
«Այս համատեքստում ես հայտարարում եմ, որ, առաջին՝ քաղաքական գործունեություն եմ սկսում։ Երկրորդ՝ ստեղծել քաղաքական շարժում, որի նպատակն է Հայաստանը ներքին և արտաքին թշնամիներից ազատագրելը, որին կարող եք միանալ նաև դուք։ Երրորդ՝ ստեղծել ապահով, անվտանգ համակարգ Հայաստանի պետության պահպանման և զարգացման համար»,- եզրափակել է նա։
