Կիրակի օրը ԱՄՆ տարածքի մեծ մասում կրկին ձմեռային խիստ եղանակ է հաստատվել, հորդառատ անձրևները ուժեղ հեղեղումներ են առաջացրել ԱՄՆ Կենտուկի նահանգում, որոնց հետևանքով առնվազն երկու մարդ է զոհվել, հաղորդում է Associated Press-ը:
Հյուսիսային հարթավայրերում կյանքին սպառնացող սառնամանիք է հաստատվել, իսկ Ջորջիա և Ֆլորիդա նահանգների որոշ շրջաններում տորնադոյի նախազգուշացումներ են արվել:
Ըստ Ազգային եղանակային ծառայության (NWS) տվյալների, ուժեղ փոթորիկներ են անցել նաև Ֆլորիդայի և Ջորջիայի որոշ շրջանների վրայով, որտեղ կիրակի վաղ առավոտյան տորնադո է նկատվել:
Հյուսիսային հարթավայրերի այլ մասերում՝ Կանադայի սահմանին մոտ, սպասվում է ըստ Ֆարենհեյթի մինչև մինուս 30 աստիճանի սառնամանիք։
Դակոտա և Մինեսոտա նահանգներում ակնկալվում են ըստ Ֆարենհեյթի մինուս 40-50 աստիճանի սառնամանիքներ:
Նոր Անգլիայի և Նյու Յորքի հյուսիսային շրջաններում առատ ձյուն է սպասվում: Որոշ շրջաններում քամու պոռթկումները կարող են հասնել մոտ 60 մղոն/ժ (97 կմ/ժ) արագության և ստեղծել «մթագնման վտանգավոր պայմաններ», -հայտնել է NWS-ը:
