Փետրվարի 7-ին ավտովթար է տեղի ունեցել Արագածոտնի մարզում: Ժամը 09:30-ի սահմաններում Արագածոտնի մարզի բնակիչ 61-ամյա Աշոտ Ղազարյանը իր վարած «Opel» մակնիշի ավտոմեքենայով Թաթուլ գյուղից դեպի Կանչ գյուղ տանող ճանապարհի 4-րդ կմ հատվածում դուրս է եկել երթևեկելի գոտուց, բախվել ճանապարհամերձ քարին և գլխիվայր հայտնվել ճանապարհի մեջտեղում:
Վթարի հետևանքով ուղևորներ, Արագածոտնի մարզի բնակիչներ 49-ամյա Մարիամ Մ-ն և 42-ամյա Ազնիվ Ն.-ն տեղափոխվել են «Թալին» բժշկական կենտրոն: Դեպքի վայր են ժամանել ՀՀ Ներքին գործերի նախարության ոստիկանության Պարեկային ծառայության Արագածոտնի մարզի գումարտակի պարեկները՝ գումարտակի հրամանատար Արտյոմ Սահակյանի, գումարտակի հրամանատարի տեղակալ Աղասի Խաչատրյան գլխավորությամբ:
Տեղում աշխատել է ՀՀ քննչական կոմիտեի Արագածոտնի մարզային քննչական վարչության Թալինի քննչական բաժնի խումբը՝ օրվա պատասխանատու հերթապահ քննչի գլխավորությամբ: Վթարի փաստով Թալինի քննչական բաժնում նախաձեռնվել է քրեական վարույթ: Գ. Շամշյանի տեղեկություններով՝ վարորդ Ա. Ղազարյանն աշխատում է Արագածոտնի մարզի գյուղերից մեկի դպրոցում՝ որպես զինղեկ:
