ՄԱԿ ԱԽ-ում Արցախի հարցով նիստի նախօրեի հրապարակմամբ անդրադարձել էինք այն իրողությանը, որ պաշտոնական Երեւանը ՄԱԿ ԱԽ դիմումը կազմել էր այնպես, որ կամ բանաձեւ չընդունվի, կամ ընդունվի Բաքվի՝ Նիկոլի կողմից ընծայված շահերի ու իրավունքների հաստատմամբ, միջազգային բարձրագույն ատյանում Արցախի հարցը փակելու նպատակով։
Դիմումը կազմված էր «հումանիտար» հիմքով, դրանում բացակայում էին քաղաքական իրավունքների, Բերձորի 5+5 կմ լայնությամբ տարածքը ցապարների բանակային ու ոստիկանական ուժերից մաքրելու, ՄԱԿ խաղաղապահների ներգրավման պահանջները։ Հումանիտար մոտեցումը Բաքվի քաղաքական իրավունքների հաստատումն է, այդ թվում՝ միջանցքի եւ Արցախի «իրավունքների եւ անվտանգության» տնօրինումը։
ՄԱԿ ԱԽ-ում քննարկումները հաստատեցին մեր պնդումները։ Ավելի վաղ, ՄԱԿ Դատարանին Երեւանի երկրորդ դիմումով փաստացի օրինականացվեց Բերձորի միջանցքում Բաքվի անցակետը։
Լրագիրն անդրադարձել է այն իրողությանը, որ Բերձորի միջանցքի կամավոր բացման այլընտրանքը Բերձորի գրոհն է Գորիսի կողմից կամ, որպես եւս մեկ տարբերակ՝ կոտորածի կազմակերպումը Բաքվից, հնարավոր է նաեւ գրոհը սահմանային այլ հատվածում: ՄԱԿ ԱԽ-ում Մոսկվայի ու Բաքվի ներկայացուցիչների հայտարարությունները վկայում են, որ Նիկոլի առաջնորդությամբ եւ ռուսների օպերատիվ երաշխավորությամբ տրվում է Արցախի «ինտեգրման» վճռորոշ փուլի մեկնարկը՝ հայերի զինաթափում եւ ջարդերի սպառնալիքով դուրսմղումը 2000-ամյա մայր հողից։
Դեռեւս 2022-ի դեկտեմբերին Լրագիրը նկարագրել էր Ռուսաստանի կողմից Բերձորի միջանցքի ռեժիմի փոփոխությանը հետեւելիք քայլերը, որոնց մի մասն այս ընթացքում իրականացվել են․ «Մոսկվան լուծարում է միջանցքի կարգավիճակը՝ այն Բաքվի լիիրավ վերահսկողությանը հանձնելով։ Նոյեմբեր 9-ի հայտարարության 6-րդ կետը չեղարկվում է փաստացի: Նպատակը Արցախը Հայաստանի Հանրապետության մնացած տարածքից ֆիզիկապես կտրելն է: Հայությունից խլում են Արցախի ընդերքը, արդեն խլված է այդ աշխարհի օդային տարածքը՝ հերթը ջրային ռեսուրսներինն է, ՀՀ դրամի շրջանառությանը, բանկային համակարգի «մանաթացմանը», համացանցային .AM դոմենի արգելմանը: Ծայրահեղության դեմ պայքարի պատրվակով Արցախի տարածքում արգելափակվելու են հայկական մնացած զլմները: Արգելվելու է ինտերնետի անմիջական արբանյակային հասանելիությունը․․․ Անցակետերն ըստ էության լինելու են լիարժեք ֆիլտրացիոն գոտիներ 1980-ականների վերջի եւ 90-ականների սկզբի օրինակով»։
Ահա սա է Փաշինյան-Միրզոյան զույգի «ԼՂ բնակիչների իրավունքներ ու անվտանգություն եւ դրանց հասցեագրում» թշնամական առաջադրանքի իմաստը եւ նպատակը, ինչը փորձ արվեց հաստատել ՄԱԿ ԱԽ-ում։
Հայությունը պետք է պատրաստ լինի «հասցեագրելու» Հայաստանի դեմ թշնամական ծրագրերի հեղինակներին ու սպասարկուներին ուր հարկն է։ Կ ռվել՝ ուրեմն կ ռվել մինչեւ թշնամու տապալում:
https://www.lragir.am/2023/08/19/782160/
