Ադրբեջանն ու Թուրքիան մտադրություն ունեն ընդլայնելու երկկողմ էներգետիկ գործակցությունը՝ նավթագազային նախաձեռնություններից անցում կատարելով դեպի կանաչ էներգետիկ միջանցքներ ու էլեկտրաէներգետիկական նոր միացումներ։ Այդ մասին տեղեկացրել է Ադրբեջանի էներգետիկայի նախարար Փարվիզ Շահբազովը ադրբեջանա-թուրքական էներգետիկ ֆորումի ընթացքում։
Պաշտոնյայի խոսքով՝ արդի պահանջները, ներառյալ թվայնացումը, արհեստական բանականության զարգացումը և տվյալների մշակման կենտրոնների ընդլայնումը, թելադրում են հզոր ցանցերի ու միջպետական կապերի ստեղծման անհրաժեշտություն։
Նախագծի գլխավոր նպատակն է Կասպից ծովի շրջանի և Կենտրոնական Ասիայի կանաչ էներգիան Ադրբեջանի ու Թուրքիայի միջոցով փոխադրել Եվրոպա։ Այդ շրջանակում նախատեսվում է Նախիջևանը Ադրբեջանի միասնական էներգետիկ համակարգին կապելու նպատակով Ջաբրայիլում կառուցել համապատասխան ենթակառուցվածք։ Հետագա փուլում նախատեսվում է Զանգեզուրի միջանցքով իրականացնել էլեկտրաէներգետիկ կապ դեպի Նախիջևան և Թուրքիա։
Գործադրվող քայլերն ուղղված են նաև Կասպից ծովի երկու ափերին գտնվող թյուրքական պետությունների էներգետիկ համակարգերի ինտեգրմանը։ Նախարարը ընդգծել է, որ այս նախաձեռնությունը նոր հեռանկարներ կբացի տարածաշրջանային էներգետիկ անվտանգության և մատակարարման ուղիների դիվերսիֆիկացման համար։
