Մոսկվայում նախատեսվող ռուս-հայկական բարձր մակարդակի բանակցությունների հիմնական թեմաներից մեկը լինելու է Հայաստանի հետագա զարգացման և արտաքին կողմնորոշման հստակեցումը, ինչպես նաև այդ հարցի շուրջ հնարավոր հանրաքվեի անցկացումը։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
Ռուսաստանի նախագահ Վլադիմիր Պուտինը և Հայաստանի վարչապետ Նիկոլ Փաշինյանը սեպտեմբերի 1-ին հանդիպել էին Ղրղզստանի մայրաքաղաք Բիշքեկում։ Մոտ մեկ ժամ տևած բանակցությունների ընթացքում քննարկվել էին հայ-ռուսական հարաբերությունները, ինչպես նաև Հայաստանի՝ Եվրամիությանն անդամակցության գործընթաց սկսելու հարցը։
Հանդիպումից հետո Փաշինյանը հայտնել էր, որ առաջիկայում նախատեսում է այցելել Մոսկվա և Պուտինի հետ շարունակել երկկողմ հարաբերություններին վերաբերող քննարկումները։
Պեսկովի խոսքով՝ Փաշինյանի այցի կոնկրետ ժամկետները դեռ պետք է համաձայնեցվեն դիվանագիտական խողովակներով՝ հաշվի առնելով երկու երկրների ղեկավարների աշխատանքային գրաֆիկները։
Կրեմլի ներկայացուցիչն անդրադարձել է նաև Բիշքեկում կայացած հանդիպման արդյունքներին՝ նշելով, որ կողմերը նախանշել են նաև առևտրատնտեսական համագործակցության մի շարք ուղղություններ։
«Փաշինյանի հետ Բիշքեկում կայացած հանդիպումը շատ կարևոր և բովանդակալից էր։ Երկկողմ առևտրատնտեսական համագործակցության հետ կապված որոշ կոնկրետ կետեր են նախանշվել, և համապատասխան գերատեսչությունները զբաղվելու են այդ հարցերի մշակմամբ»,- ասել է Պեսկովը։
Միաժամանակ Կրեմլը նախկինում հայտարարել էր, որ Հայաստանի՝ Եվրամիության հետ ինտեգրման ձգտումը Երևանի ինքնիշխան իրավունքն է, սակայն այդ գործընթացը, ըստ ռուսական կողմի, չպետք է իրականացվի ԵԱՏՄ անդամ երկրների շահերի հաշվին։
Այս հայտարարություններին զուգահեռ վերջին շրջանում առաջացել են նաև հայկական արտադրանքի՝ ռուսական շուկա արտահանման հետ կապված սահմանափակումներ։