Ո՞ւմ էին փորձում սպանել Մոսկվայի Balzi Rossi իտալական ռեստորանում. մանրամասներ
Մոսկվայի կենտրոնում գտնվող Balzi Rossi իտալական ռեստորանում տեղի ունեցած մահաբեր պայթյունից հետո գլխավոր հարցը մնում է անպատասխան․ ո՞վ էր հարձակման իրական թիրախը։
Ռուսաստանի Ազգային հակաահաբեկչական կոմիտեի պաշտոնական տվյալներով՝ օգոստոսի 1-ի երեկոյան անհայտ կինը փորձել է ինքնաշեն պայթուցիկ սարքով մտնել ռեստորան, սակայն անվտանգության աշխատակիցը կանգնեցրել է նրան մուտքի մոտ։ Մի քանի վայրկյան անց տեղի է ունեցել պայթյունը, որի հետևանքով զոհվել են կինը, անվտանգության աշխատակիցը և ռեստորանի մեկ այցելուն, իսկ առնվազն 21 մարդ տարբեր աստիճանի վնասվածքներ է ստացել։
Ռեստորանը այդ պահին փակ էր հանրության համար և հյուրընկալում էր մասնավոր միջոցառում։ Հենց այս հանգամանքն էլ բազմաթիվ հարցերի տեղիք է տվել։
Ռուսական և միջազգային մի շարք լրատվամիջոցներ, հղում անելով Telegram ալիքներին և անանուն աղբյուրներին, գրում են, որ ռեստորանում կարող էր անցկացվել Ռուսաստանի Զինված ուժերի բարձրաստիճան հրամանատարներից մեկի՝ գեներալ-գնդապետ Ալեքսանդր Չայկոյի ծննդյան միջոցառումը։ Նշվում է, որ միջոցառմանը կարող էին մասնակցել նաև զինվորականներ, ուժային կառույցների ներկայացուցիչներ և այլ բարձրաստիճան պաշտոնյաներ։
Ըստ նույն հրապարակումների՝ քննության շրջանակում դիտարկվում է վարկած, որ պայթուցիկ սարքը նախատեսված էր հենց միջոցառման մասնակիցների համար։ Որոշ աղբյուրներ նույնիսկ պնդում են, որ կինը կարող էր չիմանալ, որ իր տեղափոխած փաթեթում պայթուցիկ է եղել, և այն գործարկվել է հեռակա եղանակով, երբ անվտանգության աշխատակիցը փորձել է ստուգել այն։
Սակայն այս տեղեկությունները պաշտոնապես չեն հաստատվել։ Ռուսաստանի քննչական մարմինները չեն հայտնել, թե ով էր մասնավոր միջոցառման կազմակերպիչը, արդյոք այնտեղ իսկապես ներկա էր Ալեքսանդր Չայկոն, և եղել է արդյոք նա հարձակման թիրախը։
Հետաքննությունը շարունակվում է։ Իրավապահները դեռ չեն հրապարակել նաև զոհվածների և վիրավորների ինքնությունը, ինչպես նաև չեն հայտնել հարձակման կազմակերպիչների կամ շարժառիթների մասին։