Իրար հետևից գետն են նետվել՝ օգնության հասնելու համար․ չորս մարդ հայտնվել է մահացու վտանգի մեջ
MediaTime.am-ը գրում է.
Գերմանիայի Բոխում քաղաքում ընտանեկան հավաքույթը քիչ էր մնում ողբերգությամբ ավարտվեր, սակայն պատահաբար այնտեղով անցնող հեծանվորդի խիզախ գործողությունների շնորհիվ հաջողվել է փրկել չորս մարդու կյանքը։
Դեպքը տեղի է ունեցել Ռուր գետի ափին, որտեղ ութ հոգուց բաղկացած ընտանիքը հանգստանում էր։ Տեղական փրկարար ծառայությունների տվյալներով՝ ընտանիքի անդամներից մեկը չափազանց մոտ է կանգնել ջրի եզրին և ընկել գետը։ Նրան օգնության հասնելու համար ջուր է մտել մեկ այլ կին, սակայն նա նույնպես չի կարողացել դիմակայել հոսանքին։
Շուտով նրանց օգնելու փորձ են կատարել ևս երկու հարազատներ, սակայն իրավիճակը միայն բարդացել է։ Չորսն էլ հայտնվել են վտանգավոր իրավիճակում՝ չկարողանալով ինքնուրույն դուրս գալ ափ, թեև գետի այդ հատվածը համեմատաբար ծանծաղ է եղել։
Այդ պահին դեպքի վայրով անցնող հեծանվորդը, որը նաև բժիշկ է, նկատել է կատարվողը և անմիջապես շտապել օգնության։ Նրան հաջողվել է հերթով դուրս բերել երեք կանանց և մեկ տղամարդու։ Փրկվածներից մեկը մինչ այդ արդեն կորցրել էր գիտակցությունը, և բժիշկը տեղում առաջին բուժօգնություն է ցուցաբերել նրան։
Դեպքի մասին ահազանգել են ընտանիքի անդամները, ինչից հետո ժամանել են փրկարարներն ու շտապօգնության աշխատակիցները։ Գիտակցությունը կորցրած կինը տեղափոխվել է հիվանդանոց, իսկ մյուս երեք տուժածները ստացել են թեթև վնասվածքներ։
Փրկարարական գործողությունը տևել է գրեթե երկու ժամ։ Միջադեպից հետո ընտանիքի անդամներին նաև հոգեբանական աջակցություն է ցուցաբերվել, քանի որ նրանք ականատես են եղել իրենց հարազատների կյանքին սպառնացող վտանգին։
Տեղական փրկարար ծառայություններն ու Գերմանիայի ջրափրկարարական միությունը դեպքից հետո կրկին հիշեցրել են գետերում և հոսող ջրերում լողալու վտանգների մասին՝ հատկապես նրանց համար, ովքեր չեն տիրապետում լողի հմտություններին։
Աղբյուր՝ The Guardian
