Վարչապետ Նիկոլ Փաշինյանը լրագրողների հետ ճեպազրույցում հայտարարեց, որ Ռուսաստանից Հայաստան մատակարարվող գազի գինը չի կարող թանկանալ, քանի որ Հայաստանն ու Ռուսաստանը դրա հետ կապված ունեն գործող պայմանագիր։
«Գազի գնի թանկացում չի կարող լինել, որովհետև մենք պայմանագիր ունենք, որը գործում է և փոխշահավետ է։ Այնտեղ պայմաններ կան, մենք իրականում գազի գնի հետ կապված հստակ ռազմավարական պայմանավորվածությունների ենք եկել, և այդ պայմանավորվածությունները պետք է պահվեն»,- ասաց վարչապետը։
Ավելի վաղ տեղեկություններ էին շրջանառվել, թե ռուսական գազի գինը Հայաստանի համար կարող է թանկանալ, որին ի պատասխան՝ Հայաստանի հանրային ծառայությունները կարգավորող հանձնաժողովը հերքել էր այդ լուրերը։