Նյու Յորքի Բրուքլին շրջանում 33-ամյա Սամանթա Ռանդացցոն դատարանի դահլիճում տղա է ունեցել՝ հենց թմրանյութերի պահպանման գործով դատական նիստի ժամանակ, հայտնում է NBC News։
Ըստ Նյու Յորքի ոստիկանության՝ կնոջը ձերբակալել էին հինգշաբթի երեկոյան այն բանից հետո, երբ բնակելի համալիրի տանիքում թմրանյութ էր հայտնաբերվել։ Նրա նկատմամբ մեղադրանք էր առաջադրվել թմրանյութերի ապօրինի պահպանման և ապօրինի մուտքի համար։
Ոստիկանության փոխանցմամբ՝ ձերբակալության պահին Ռանդացցոն լայն հագուստ էր կրում, չէր տեղեկացրել, որ հղի է, և հրաժարվել էր բուժօգնությունից։
Ուրբաթ առավոտյան՝ մոտ 03:30-ին, նա իրավապահներին հայտնել է, որ հղի է և ունի թմրանյութերից հրաժարման ախտանիշներ։ Դրանից հետո կնոջը տեղափոխել են հիվանդանոց, որտեղ զննությունից հետո նրան դուրս են գրել։
Սակայն հիվանդանոցից դուրս գրվելուց մոտ չորս ժամ անց, դատարանում մեղադրանքի ներկայացման ընթացքում, նրա ծննդաբերությունը սկսվել է։
Փաստաբանների և ականատեսների խոսքով՝ Ռանդացցոն երեխային լույս աշխարհ է բերել դատարանի նստարանին՝ առանց համապատասխան բժշկական պայմանների և անհրաժեշտ օգնության ապահովման։
Կնոջ փաստաբան Ուինթոն Շարփը հայտնել է, որ ծնվել է տղա։ Նրա խոսքով՝ դատարանի աշխատակիցները փորձել են արագ արձագանքել այն բանից հետո, երբ կնոջ պտղաջրերը հեռացել են։
Դեպքից հետո Իրավաբանական օգնության ընկերությունը և հանրային պաշտպանների մի շարք կազմակերպություններ խիստ քննադատել են իշխանությունների գործողությունները՝ նշելով, որ խախտվել են կալանքի տակ գտնվող հղի կանանց նկատմամբ կիրառվող ընթացակարգերը։
Իրավապաշտպանները պահանջել են պաշտոնական քննություն և գործող կանոնների վերանայում՝ ընդգծելով, որ տեղի ունեցածը ոչ միայն ընթացակարգային ձախողում էր, այլ նաև համակարգի «խորը բարոյական ձախողում»։
