Թանգարաններ այցելելը դանդաղեցնում է ծերացման գործընթացը․ նոր հետազոտություն

MediaTime.am գրում է, որ արվեստով և մշակութային միջոցառումներով հետաքրքրվելը կարող է դրական ազդեցություն ունենալ մարդու առողջության վրա և նույնիսկ դանդաղեցնել կենսաբանական ծերացումը։ Այս եզրակացությանն են եկել Մեծ Բրիտանիայի գիտնականները։

Լոնդոնի համալսարանական քոլեջի (UCL) մասնագետներն ուսումնասիրել են ավելի քան 3500 չափահաս մարդկանց տվյալներ՝ գնահատելով, թե որքան հաճախ են նրանք մասնակցում մշակութային տարբեր միջոցառումների, այդ թվում՝ թանգարանների այցելությունների, երաժշտության, ընթերցանության և արվեստի այլ ձևերի։

Հետազոտության արդյունքներով՝ այն մարդիկ, ովքեր շաբաթական առնվազն մեկ անգամ զբաղվել են արվեստի կամ մշակութային գործունեությամբ, ունեցել են կենսաբանական ծերացման ավելի դանդաղ տեմպեր։ Գիտնականները պարզել են, որ նրանց մոտ ծերացման արագությունը միջինում մոտ 4 տոկոսով ավելի ցածր է եղել։

Հետազոտության ընթացքում կիրառվել են հատուկ «էպիգենետիկ ժամացույցներ», որոնք գնահատում են օրգանիզմի կենսաբանական տարիքը՝ ԴՆԹ-ում տեղի ունեցող փոփոխությունների հիման վրա։ Արդյունքները նաև ցույց են տվել, որ մշակութային կյանքին ակտիվ մասնակցող մարդիկ առողջական ցուցանիշներով միջինում մեկ տարով «ավելի երիտասարդ» են եղել։

Մասնագետները հետագայում արվեստն ու մշակութային ակտիվությունը դիտարկում են որպես առողջ ապրելակերպի կարևոր բաղադրիչներից մեկը։

Աղբյուր՝ UCL News