Եթե Փաշինյանի կառավարությունը 8 տարվա ընթացքում փոփոխություն չի բերել, ապա նոր 5 տարում էլ չի բերի. Նարեկ Կարապետյան
Եթե Փաշինյանի կառավարությունը 8 տարվա ընթացքում փոփոխություն չի բերել, ապա նոր 5 տարում էլ չի բերի: Այս մասին Կենտրոն ՀԸ-ը տված հարցազրույցի ժամանակ ասել է «Ուժեղ Հայաստան» կուսակցության խորհրդի անդամ Նարեկ Կարապետյանը:
«Տեսականորեն մենք պետք է չընդունենք չհաղթելը, եթե այս պայքարի մեջ մենք այդպիսի տեսություններ ընդունեինք, առաջին օրվանից այդ տեսությունների մեջ չէինք մտնի: Այս պայքարը պայքար չէ ինչ-որ մեկին հաղթելու, պայքար է ընդհանուր Հայաստանի ռազմավարական զարգացումը ապահովելու, ծնկից բարձրանալու, Հայաստանի ազգային միատարրությունը պահպանելու, իրապես զարգացող տնտեսություն ստեղծելու, ոչ թե փոքր ասֆալտապատումով ժողովրդի աչքերին թոզ փչելու: Ասֆալտապատումը մեր երազանքների պիկը պետք է չլինի, մեր գործի հիմնական նպատակն է, որ մարդիկ իրենց գրպանի վրա զգան՝ երկրում բան է փոխվել, և աշխատանք ունենան։
Երևանում ապրելով մարդիկ չեն պատկերացնում, թե ինչ բարդ վիճակ է ռեգիոններում, ռեգիոններում չկա տնտեսական քաղաքականություն, զրոյին է մոտ տնտեսական քաղաքականությունը: 8 տարին դա նորմալ իշխանության ամբողջ ժամանակահատվածն է և դրա ընթացքում ոչ մի բան չի արվել, 8 տարում եթե դա չի արվել, նոր 5 տարում էլ չի արվելու, ուղղակի էլի իրենք իրենց գործերն են անելու, իրենց պարգևավճարներն են վճարելու, դուք էլ մնալու եք նույն իրավիճակում՝ մի քիչ ավելի շատ ասֆալտով, շուկաներում թանկ գների մթերքով և բերքի իրացման խնդրով, աշխատատեղերի բացակայությամբ, արդարության զգացումի վերացմամբ: Մեր երազանքը գոյատևելը չի, մեր երազանքն է, որ մեր ժողովուրդը լավ ապրի»,-նշել է Կարապետյանը:
