Վարչապետ Նիկոլ Փաշինյանը սոցիալական իր էջերում մայիսի 28-ին նախատեսված զորահանդեսի փորձից կադրեր է հրապարակել։
«Արտադրված է Հայաստանում» վերտառությամբ տեսանյութում ներկայացված են հայկական արտադրության «DEV–3» հետախուզահարվածային թռչող սարքերը։
Մեկ այլ տեսանյութում էլ Ֆրանսիայից ձեռքբերված CAESAR թնդանոթներն են
Մայիսի 11-ին Երևանում քարոզարշավի ընթացքում Նիկոլ Փաշինյանը քաղաքացիներին հայտնեց, որ մայիսի 28-ին ցուցադրությունից հետո զինտեխնիկան կտեղակավյի Տիգրան Մեծ պողոտայում, որպեսզի քաղաքացիները հնարավորություն ունենան տեսնել ձեռքբերված զինտեխնիկան։
Հայաստանն ու Ֆրանսիան CAESAR-ի ձեռքբերման պայմանագիրը ստորագրել էին 2024-ին։
Caesar-ը 155մմ տրամաչափի ինքնագնաց հաուբից է, որի հեռահարությունն առավել առաջադեմ արկերի կիրառման դեպքում գերազանցում է 50 կիլոմետրը:
Այն ակտիվորեն կիրառվում է Ուկրաինայում ընթացող պատերազմում: 2023-ի դեկտեմբերին Ֆրանսիայի Սենատը հորդորել էր հնարավորինս արագացնել Հայաստանին հաուբիցների ուսումնասիրության հարցը:
Փաշինյանը մարտին հայտնել էր, որ մայիսի 28-ին՝ Հանրապետության օրվա առթիվ, Երևանի Հանրապետության հրապարակում տեղի կունենա վերջին տարիներին ձեռք բերված զինտեխնիկայի ցուցադրություն։
Թեև վարչապետ Փաշինյանը մարտին շեշտել էր, որ նախատեսվող միջոցառումը ոչ թե դասական զորահանդես է, այլ յուրօրինակ «հաշվետվություն» Հայաստանի քաղաքացիներին, այսօր իր սոցիալական էջերում հրապարակված տեսանյութը նկարագրելիս զորահանդես բառն է օգտագործել․ «Մայիսի 28-ի զորահանդեսի փորձ»։
Մեկ ամիս առաջ Փաշինյանը լրագրողների հետ ճեպազրույցի ժամանակ համարել էր, որ «զորահանդես»-ը նուրբ երևույթ է և կարող է խաղաղության օրակարգից շեղվելու տպավորություն ստեցծի։
«Մենք այս թեմայով աշխատում ենք մեր միջազգային գործընկերների հետ։ Զորահանդեսը շատ նուրբ երևույթ է և կարող է նաև տպավորություն ստեղծի խաղաղության օրակարգից շեղվելու, խաղաղության օրակարգից հրաժարվելու, և մենք աշխատում ենք և շարունակելու ենք աշխատել միջազգային հանրության մեր գործընկերների հետ, ներառյալ տարածաշրջանի երկրների հետ, որպեսզի նրանք որևէ կերպ դա չընկալեն որպես խաղաղության օրակարգից հրաժարում»,- պարզաբանել էր վարչապետը:
