Ադրբեջանի ԱԳՆ-ն պարզաբանում է պահանջել ռուսական Առաջին ալիքից ցուցադրված քարտեզի համար
Մայիսի 6-ին ռուսական պետական Առաջին ալիքի «Время покажет» հաղորդման ընթացքում ցուցադրվել է քարտեզ, որի վրա Ղարաբաղը պատկերված է եղել Ադրբեջանի տարածքից առանձին։
Ադրբեջանը սա որակել է որպես լուրջ սադրանք և անթույլատրելի քաղաքական մանիպուլյացիա, երկրի ԱԳՆ-ն պարզաբանումներ է պահանջել Ռուսաստանից, հայտնում են ադրբեջանական ԶԼՄ-ները:
«Ադրբեջանի տարածքային ամբողջականության և ինքնիշխանության նկատմամբ անփոփոխ հարգանքի մասին Ռուսաստանի հայտարարությունների ֆոնին ՌԴ պետական հեռուստատեսությամբ հնացած, կեղծ և անջատողականությունը խրախուսող նարատիվների հեռարձակումը բացահայտ հակասում է ադրբեջանա-ռուսական հարաբերությունների ոգուն, ինչպես նաև փոխադարձ հարգանքի և բարիդրացիության սկզբունքներին։
Պետական մեդիառեսուրսների անպատասխանատու և կողմնակալ մոտեցումն անթույլատրելի է։ Ակնկալվում է, որ ռուսական կողմը հստակ պարզաբանումներ կտա այս հարցի վերաբերյալ և անհրաժեշտ միջոցներ կձեռնարկի նմանատիպ դեպքերի կրկնությունը բացառելու համար»,- ասվում է հաղորդագրության մեջ:
