Ո՞ր 6 խախտումների համար վարորդներից կհանվի 2 տուգանային միավոր

Որպես կանոն վարորդների կատարած իրավախախտումների համար կիրառվում են տուգանքներ և տուգանային միավորներ։ Սակայն շատերը չգիտեն, որ Վարչական իրավախախտումների վերաբերյալ օրենսգիրքը սահմանում է վեց կոնկրետ խախտումներ, որոնց համար հանվում է 2 տուգանային միավոր։

Ինչպես տեղեկացնում է Iravaban.net-ը, Վարչական իրավախախտումների վերաբերյալ օրենսգիրքը սահմանում է հետևյալ խախտումները՝

Խախտումները և տուգանքները

1. Հաշվառման համարանիշի նիշը փակելը.

Օրենսգրքի 123.5-րդ հոդվածի 1.1-ին մասի համաձայն՝ տրանսպորտային միջոցի հաշվառման համարանիշի առնվազն մեկ նիշը փակելը՝ առաջացնում է տուգանքի նշանակում՝ 25,000 դրամ, տուգանային միավորի կիրառում՝ 2 միավոր։

2. Լուսացույցի կամ կարգավորողի արգելող ազդանշանին չենթարկվելը.

Օրենսգրքի 124.3-րդ հոդվածի 1-ին մասի համաձայն՝ տրանսպորտային միջոցների վարորդների կողմից լուսացույցի կամ կարգավորողի արգելող ազդանշանին չենթարկվելը՝ առաջացնում է տուգանքի նշանակում՝ 25,000 դրամ, տուգանային միավորի կիրառում՝ 2 միավոր։

3. Արագությունը 11-30 կմ/ժ գերազանցելը.

Օրենսգրքի 124.4-րդ հոդվածի 2-րդ մասի համաձայն՝ երթևեկության սահմանված արագությունը 11-30 կմ/ժ-ով գերազանցելը՝ առաջացնում է տուգանքի նշանակում՝ 20,000 դրամ, տուգանային միավորի կիրառում՝ 2 միավոր։

4. Վթարային իրադրություն առաջացնելը.

Օրենսգրքի 124.6-րդ հոդվածի 1-ին մասի համաձայն՝ ճանապարհային երթևեկության անվտանգության ապահովման բնագավառի օրենսդրությունը խախտելը, որի հետևանքով առաջացել է վթարային իրադրություն՝ առաջացնում է տուգանքի նշանակում՝ 20,000 դրամ, տուգանային միավորի կիրառում՝ 2 միավոր։

5. Ստանդարտին չհամապատասխանող լուսային կամ ձայնային սարքավորումներ տեղադրելը.

Օրենսգրքի 123.1-ին հոդվածի 1-ին մասի համաձայն՝ տրանսպորտային միջոցների վրա ստանդարտին չհամապատասխանող լուսային կամ ձայնային ազդանշաններ արձակելու սարքավորումներ կամ տրանսպորտային միջոցներում ստանդարտին չհամապատասխանող խլացուցիչներ կամ նվագարկիչների լրացուցիչ ուժեղացուցիչներ կամ բարձրախոսներ տեղադրելը կամ դրանք տեղադրված վիճակում վարելը կամ շարժման ընթացքում դրանք օգտագործելը՝ առաջացնում է տուգանքի նշանակում՝ 10,000 դրամ, տուգանային միավորի կիրառում՝ 2 միավոր։

6. Զույգ համարանիշ ունեցող տրանսպորտային միջոցը մեկ համարանիշով վարելը.

Օրենսգրքի 123.5-րդ հոդվածի 16-րդ մասի համաձայն՝ զույգ հաշվառման համարանիշեր ունեցող տրանսպորտային միջոցը մեկ հաշվառման համարանիշով վարելը՝ առաջացնում է տուգանքի նշանակում՝ 20,000 դրամ, տուգանային միավորի կիրառում՝ 2 միավոր։

Ուշադրություն. վարորդական վկայական ունեցող անձը տարեկան ունի 13 տուգանային միավոր։ Վերը նշված վեց խախտումներից յուրաքանչյուրը հանում է 2 միավոր։

Հիշեք՝ տուգանքների հաշվարկման հիմքում ընկած է 1,000 դրամի հաշվարկման միավորը,- տեղեկացնում է Iravaban.net-ը։

Հավելյալ տեղեկությունների համար կարող եք այցելել Iravaban.net մասնագիտական առցանց մեդիա։

Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ Կոնկրետ իրավիճակներում իրավաբանական խորհրդատվություն ստանալու համար անհրաժեշտ է դիմել մասնագետի։

Իրավաբան.net