Վայոց Ձորի մարզի Խաչիկ բնակավայրում շատ երկար ժամանակ մի խառը պատմություն գոյություն ունի, երբ գյուղի երկու բնակիչներ վարկ են վերցրել և գործնականում ամբողջ գյուղին դարձրել են վարկի երաշխավորներ: Այս մասին այսօր կառավարության հերթական նիստին ասաց ՀՀ վարչապետ Նիկոլ Փաշինյանը և նշեց, որ քրեական գործ էլ կա հարուցված:
Նա նշեց, որ ամեն անգամ մտածում էին, թե ինչպես դուրս գան այս իրավիճակից: «Երկու բնակիչ վարկերը չեն փակել և ամբողջ գյուղն ըստ էության հայտնվել է սև ցուցակում, չեն կարողանում վարկ վերցնել»,- ասաց նա և նշեց, որ այս թեմային առնչվել է նաև այն ժամանակ, երբ պատգամավոր էր:
«Մենք կառավարության այսօրվա նիստում կայացրել ենք կարծում եմ՝ եզակի մի որոշում, մենք որոշել ենք պետական բյուջեից 65,7 միլիոն դրամ հատկացնել և զրոյացնել Խաչիկ գյուղի այն բնակիչների վարկային պատմությունը, որոնք երաշխավոր են դարձել ու վստահության զոհ դարձել»,- ասաց նա և հայտնեց, որ Կենտրոնական բանկի հետ էլ է խոսել և այդ քաղաքացիները հնարավորություն կունենան վարկեր ստանալու, ծրագրերից օգտվելու: Նա կոչ արեց քաղաքացիներին այդպիսի պատմությունների մեջ չընկնել:
