Իմ ախպոր վրեժը պետք է լուծեմ․ Ներքին Հանդում զոհված 41-ամյա Գագիկը 3 անչափահաս երեխա ունի
Ներքին Հանդի տարածքում տեղակայված մարտական դիրքում թշնամու կողմից արձակած կրակոցների հետևանքով զոհված 41-ամյա Գագիկ Վարազդատի Մանուկյանը Կոտայքի մարզի Քասախ գյուղից էր, ամուսնացած էր ունի 3 անչափահաս երեխա։
«Գագիկը շատ լավ մարդ էր, հոգատար հայր, լավ ամուսին։ 3 երեխա ունի՝ 2 աղջիկ, 1 տղա։ Ինքը նաև 44-օրյա պատերազմին է մասնակցել․․․ 15 օր առաջ էր դիրքեր բարձրացել»,- պատմեց Քասախ գյուղի բնակիչներից մեկը։
Գագիկ Մանուկյանը 44-օրյա պատերազմում զոհված կապիտան Իշխան Պետրոսյանի ազգականն է։ Մեր զրուցակցի խոսքով՝ հատկապես կապիտանի զոհվելուց հետո Գագիկը մշտապես ասել է, որ պետք է վրեժ լուծի․
«Հարազատները ասել են՝ մի գնա, որ քեզ մի բան լինի, երեխաներդ անհեր են մեծանալու, բայց չի լսել նրանց, ասել է՝ իմ ախպոր վրեժը պետք է լուծեմ։ Ինքը միշտ դիրքեր է բարձրացել՝ 15 օր տանը, 15 օր դիրքերում»։
Հիշեցնենք, որ Սյունիքի մարզի Ներքին Հանդ գյուղի հատվածում տեղակայված դիրքերի վրա թշնամու կողմից արձակած կրակոցների հետևանքով հայկական կողմն ունի 4 զոհ և 1 վիրավոր։
Փետրվարի 13-ին Ներքին Հանդի հատվածում տեղակայված հայկական դիրքերի ուղղությամբ Ադրբեջանի ԶՈՒ կրակի հետևանքով զոհվել են ՝
Էդուարդ Համլետի Հարությունյան (1974 թ.),
Գագիկ Վարազդատի Մանուկյան (1982 թ.),
Արսեն Գագիկի Համբարձումյան (1979 թ.),
Հրաչյա Թալիշի Հովհաննիսյան (1957 թ.)։
կիսվել
https://oragir.news/hy/material/2024/02/13/106701?fbclid=IwAR3harl7bF7Mtp22xsW5p4Vwof9oSfYYyjalYnzSlpmo2H5bcSWQqtMQ5GY
