Արտաշատի համայնքապետարանից հայտնում են, որ 4-ամյա երեխային նկատել են Լանջազատի բնակչուհիներ Ռիմա Մելքոնյանը և Գոհար Թորոսյանը։
«Հուլիսի 13-ին` ժամը 13:18-ին, ՆԳՆ ՓԾ Ճգնաժամային կառավարման ազգային կենտրոն տեղեկություն էր ստացվել, որ Արարատի մարզի Գետազատ բնակավայրի հանգստյան գոտիներից մեկում երեխա է կորել։
Անմիջապես նշված վայր են մեկնել ՆԳՆ Փրկարար ծառայության և Ոստիկանության մեծաթիվ ուժեր ու սկսել լայնածավալ որոնողական աշխատանքներ։
Որոնողական աշխատանքներին անմիջապես ներգրավվել են Արարատի մարզպետ Սեդրակ Թևոնյանը, Արտաշատ համայնքի ղեկավար Կառլեն Մկրտչյանը, մարզպետի աշխատակազմի և համայնքապետարանի աշխատակիցներ։
Ժամը 18։38-ի սահմաններում 4-ամյա երեխան հայտնաբերվել է Արարատի մարզի Լանջազատ բնակավայրում՝ գետի ափին։ Երեխայի մարմնի վրա առկա են եղել քերծվածքներ։ Նրան տեղափոխել են Արտաշատի բժշկական կենտրոն։
Նշենք, որ երեխային նկատել և ոստիկանություն են ահազանգել Լանջազատի բնակչուհիներ Ռիմա Մելքոնյանը և Գոհար Թորոսյանը։
Մեր անկեղծ երախտագիտությունն ենք հայտնում նրանց և բոլորին, ովքեր ներգրավված էին որոնողական աշխատանքներում»,-ասվում է համայնքապետարանի հաղորդագրության մեջ։
No Comment! Be the first one.