«Հիփոթեքով բնակարան ձեռք բերող ընտանիքներին դրամական աջակցություն՝ կանխավճարի ապահովագրության տարեկան ապահովագրական վճարի իրականացման համար» ծրագրի շրջանակում հիփոթեքային վարկով բնակարան ձեռք բերող շահառուին տրամադրվում է դրամական աջակցություն, որն ուղղվում է կանխավճարի ապահովագրության տարեկան ապահովագրական վճարի մարմանը։ Կանխավճարի ապահովագրության ծրագրով տրվող դրամական աջակցության չափը սահմանվում
է համապատասխան պայմանագրով սահմանված տարեկան ապահովագրական վճարի 90 տոկոսի չափով, բայց ոչ ավելի, քան տարեկան 180,000 դրամը։
Այս մասին Iravaban.net-ը տեղեկանում է Պետական աջակցության ծրագրերի իրազեկման հարթակից։
Ծրագրից կարող են օգտվել այն քաղաքացիները, որոնք բավարարում են հետևյալ պարտադիր պայմաններին.
-շահառուի խնամքին առկա է առնվազն 1 անչափահաս երեխա,
-ձեռք բերվող անշարժ գույքի ձեռքբերման գինը և գնահատված շուկայական գինը կամ կառուցվող անշարժ գույքի նախահաշվային գինը՝ առավելագույնը 30 մլն դրամ, որն ավելացվում է շահառուի 3-րդ և հաջորդ յուրաքանչյուր երեխայի հաշվով 5 մլն դրամով,
-կատարվող կանխավճարի նվազագույն չափը (առանց պետական աջակցության ծրագրերի շրջանակներում տրամադրվող աջակցության)՝ երկրորդային շուկայից ձեռք բերվող բնակելի անշարժ գույքի արժեքի առնվազն 10 տոկոս է և առաջնային շուկայից ձեռք բերվող բնակելի անշարժ գույքի արժեքի առնվազն 7,5 տոկոս է,
-բնակելի անշարժ գույքը ձեռք է բերվում 2020 թվականի հուլիսի 1-ից հետո, և անհրաժեշտ տեղեկությունները
Աշխատանքի և սոցիալական հարցերի նախարարություն են ներկայացվում նախքան վարկային պայմանագրի կնքումը։
Միջոցառումներից օգտվելու համար անհրաժեշտ է դիմել Աշխատանքի և սոցիալական հարցերի նախարարության հետ պայմանագիր կնքած որևէ բանկ կամ վարկային կազմակերպություն։
Անհրաժեշտ փաստաթղթերի ցանկին ծանոթնալու համար դիմել բանկ կամ վարկային կազմակերպություն։
