«Ես երբեք չեմ տեսել, որ էպիկենտրոնը վարչական շրջանով նշվի»,- Araratnews.am-ի հետ հարցազրույցում, անդրադառնալով մամուլում տարածված տեղեկատվությանը, թե մարտի 12-ի երկրաշարժի էպիկենտրոնը գտնվել է Մալաթիա-Սեբաստիա վարչական շրջանում՝ հայտարարեց ՆԳՆ սեյսմիկ պաշտպանության տարածքային ծառայության պետ Սոս Մարգարյանը, նշելով, որ էպիկենտրոնը երբեք վարչական տարածքով չի նշվում։
«Սովորաբար այն նշվում է քաղաքի աշխարհագրական կենտրոնից որոշակի ուղղությամբ և հեռավորությամբ։ Էպիկենտրոնը քարտեզով են նշում՝ ըստ դիրքի։ Այսքան ժամանակ չի եղել, որ մենք վարչական տարածքով էպիկենտորն տանք։ Մարտի 12-ի երկրաշարժը 2.7 մագնիտուդ ուժգնություն ուներ, էպիկենտրոնում՝ 3-4 բալ, և այն տեղակայված էր Երևանից 13 կմ հարավ-արևմուտք»,- ասաց մասնագետը, հավելելով, որ իրականում երկրաշարժի օջախը երկրաչափական մարմին է։ Խզվածքները շարժվում են՝ ուժեղ երկրաշարժերի դեպքում՝ մետրերով, թույլերի դեպքում՝ սանտիմետրերով։
«Երբ ասում են էպիկենտրոն, դա պայմանական կետն է։ Մենք շատ հաճախ խոսում ենք Եվրոպական-միջերկրածովյան սեյսմոլոգիական կենտրոնի տված ցուցանիշներով, որտեղ նույն երկրաշարժը կարող է լինել էպիկենտրոնի 10, 20, 25 կմ տարբերությամբ։ Հետևաբար ճիշտը տվյալ երկիրն է, որտեղ տեղի է ունեցել երևույթը, քանի որ գրանցող ամենամոտ կայաններն իրենն են, և սխալանք չի կարող լինել»,- հստակեցրեց Մարգարյանը։
Մասնագետն ընդգծեց, որ Հայաստանում սեյսմիկ ակտիվությունը բնականոն է, երկրաշարժերը չեն ակտիվացել։ «Մենք ապրում ենք սեյսմոակտիվ գոտում, և երկրաշարժերը եղել են ու լինելու են։ Օրական գրանցվում են շատ թույլ երկրաշարժեր, որոնք սարքերը ֆիքսում են, մենք վերլուծում ենք, անհրաժեշտության դեպքում հայտնում բնակչությանը։ Օրինակ, Ջավախքի օջախային գոտում օրական 10-15 փոքր երկրաշարժ է գրանցվում, ինչը տվյալ տեղանքին բնորոշ սեյսմիկ պատկերի մասն է»,- ասաց Մարգարյանը, միևնույն ժամանակ վստահեցնելով, որ ամեն ինչ մասնագետների վերահսկողության կենտրոնում է՝ գրանցվում և վերլուծվում է։
«Օրեր առաջ Երևանի խզվածքում 3 շատ թույլ երկրաշարժ է գրանցվել և ՆԳՆ սեյսմիկ պաշտպանության տարածքային ծառայությունը ուշադիր հետևել է իրավիճակին»,- եզրափակեց Սոս Մարգարյանը։
Զրուցեց՝ Սիլվի Պետրոսյանը
No Comment! Be the first one.