Գլխավոր նախապայմանը մեկն է՝ լինել գրանցված աշխատող, որպեսզի իր աշխատավարձից հարկադիր կատարումն ապահովող ծառայությունը կարողանա գումար գանձել։ Աշխատանքի և սոցիալական հարցերի նախարարության մամուլի քարտուղար Զառա Մանուչարյանը MediaHub-ին ասաց, որ աջակցության ծրագիրը երկու կարևոր առանձնահատկություն ունի, դրանցից մեկն այն է, որ քաղաքացու վարկը կմարվի իր աշխատավարձից փոխանցվող եկամտահարկի հաշվին, իսկ մյուս առանձնահատկությունը գանձվող սահմանաչափի նվազեցումն է՝ 50 տոկոսի փոխարեն 20 տոկոս։

«Աջակցության ծրագրից կարող են օգտվել նրանք, որոնք դասակարգվել են որպես անհուսալի վարկառու, և իրենց բոլոր վարկերի հանրագումարը դիմելու օրվա դրությամբ 1 մլն դրամից փոքր է և անհուսալի են դասակարգված առնվազն երեք տարի։ Աջակցության ծրագրի առանձնահատկությունն այն է, որ եթե նախկինում Հարկադիր կատարման ծառայության կողմից կարող էր բռնագանձվել աշխատավարձի մինչև 50 տոկոսի չափով գումար, ապա հիմա բռնագանձվելու է 20 տոկոսի չափով։ Բացի այդ, ծրագրի հիմնական նպատակն այն է, որ աջակցենք աշխատավարձից գանձվող եկամտահարկի չափով, որն ուղղվելու է, բնականաբար, վարկային պարտավորության մարմանը»,– ասաց տիկին Մանուչարյանը՝ նշելով, որ այսպիսով իրենք նպատակ ունեն խրախուսեն անհուսալի վարկեր ունեցողներին, եթե աշխատանք չունեն կամ գրանցված աշխատող չեն, անցնեն գրանցված աշխատանքի։

Նախարարության մամուլի քարտուղարը հատուկ շեշտեց, որ եթե քաղաքացու վարկը դիմումը տալու օրվա դրությամբ 1 մլն դրամից ավելի է, ապա նա չի կարող օգտվել այս ծրագրից թեկուզ միայն 1 միլիոնի չափով, փոխարենը կարող է իր վարկը նվազեցնել մինչև 1 միլիոն, հետո նոր դիմել։

Նշենք, որ ծրագիրը մեկնարկել է փետրվարի 1-ից, այսինքն՝ դիմումներն այդ օրվանից սկսած արդեն ընդունվում են, իսկ ծրագրի ավարտի մասով դեռ որոշված ժամկետ չկա։ Դիմումներն ընդունվում են

https://e-social.am/services

հարթակում, որտեղ քաղաքացին պետք է սեղմի «Կյանքի դժվարին իրավիճակ» պատուհանի վրա, այնուհետև ընտրի «Անհուսալի վարկերի միջոցառում» դաշտը և լրացնի պահանջվող տվյալները։

Վահե Մակարյան