Հաստ աղիքի քաղցկեղը համարվում է ամենավտանգավոր հիվանդություններից մեկը, ուստի դրա ժամանակին ախտորոշումը չափազանց կարևոր է։ Վիրաբույժ-ուռուցքաբան Իրինա Սկորկինա ներկայացրել է այն հիմնական ախտանշանները, որոնք կարող են հուշել հիվանդության մասին։ Այս մասին հայտնում է MediaTime.am-ը՝ հղում անելով Газета.Ru-ին։
Բժշկի խոսքով՝ հաստ աղիքի քաղցկեղի ամենահաճախ հանդիպող նշաններից մեկը կղանքում վառ կարմիր կամ մուգ կարմիր արյան առկայությունն է, ինչը կարող է պայմանավորված լինել հաստ աղիքում առաջացած արյունահոսությամբ։
Նա նշել է նաև, որ հիվանդության դեպքում հաճախ ի հայտ են գալիս որովայնային ցավեր և բութ սպազմներ, որոնք համարվում են առաջին նախազգուշացնող ախտանշաններից։ Այս վիճակը հաճախ ուղեկցվում է փորլուծությամբ կամ փորկապությամբ։
Մասնագետի խոսքով՝ հիվանդության մասին կարող է վկայել նաև անբացատրելի քաշի կորուստը։ Դա պայմանավորված է նրանով, որ ուռուցքը օրգանիզմի սննդարար նյութերն ու էներգիան օգտագործում է իր աճի և զարգացման համար։ Սակայն այս ախտանշանը հիմնականում նկատվում է հիվանդության ավելի ուշ փուլերում։
Վտանգավոր բարդություններից խուսափելու և բուժումը ժամանակին սկսելու համար բժիշկը խորհուրդ է տալիս ուշադիր լինել սեփական առողջական վիճակի նկատմամբ նույնիսկ այն դեպքում, երբ ակնհայտ ախտանշաններ չկան։ Նրա խոսքով՝ անբացատրելի անհանգստության դեպքում անհրաժեշտ է դիմել մասնագետի և անցնել համապատասխան հետազոտություններ։
