«Վիրուսը սկսել է «ճամփորդել» ու նոր դեպքերի քանակը կարող է կտրուկ ավելանալ»․ Հովակիմ Զաքարյան

Կենսաբանական գիտությունների թեկնածու Հովակիմ Զաքարյանը ֆեյսբուքյան իր էջում գրել է․ «Կապիկի ծաղիկը (Mpox) նորություն չի։ 1970-ական թվականներից պարբերաբար գրանցվել են այս վիրուսի դեպքեր, հիմնականում Աֆրիկայում, քանի որ վիրուսի բնական տերերը Աֆրիկայում տարածված փոքր կապիկների մի քանի տեսակներ են։ Վիրուսը պատկանում է կարգաբանական նույն ընտանիքին, ինչ բնական ծաղիկի վիրուսը, որն այլևս չի հանդիպում բնության մեջ։ Ինչո՞ւ է ԱՀԿ հիմա ահազանգում։ Քանի որ վերջին մեկ տարվա մեջ գրանցվել է 18000ից ավել դեպք, որից շուրջ 900 մահվան ավարտով (մոտ 5%)։ Անցյալում նմանատիպ խոշոր բռնկում դեռ չէր եղել։

Վիրուսի առաջին դեպքը նաև գրանցվեց Աֆրիկայից դուրս՝ Շվեդիայում, ինչը նշանակում է, որ վիրուսը սկսել է «ճամփորդել» ու նոր դեպքերի քանակը կարող է կտրուկ ավելանալ։ Վիրուսը տարածվում է կոնտակտային եղանակով, ունի համեմատաբար կարճ ինկուբացիոն/թաքուն շրջան։ Ի՞նչ պետք է անի ՀՀ ԱՆ։ Նախ 1) ապահովի ախտորոշման համար անհրաժեշտ ռեագենտների մեծ չափաքանակ (եթե դեռ չի արել), 2) որոշի այն թիրախային խմբերին, որոնք պետք է նմուշառվեն եթե նույնիսկ չկան սիմպտոմներ, 3) սահմանին ավելի լուրջ վերահսկողություն իրականացնի՝ հաշվի առնելով, որ տուրիստական սեզոնը դեռ չի ավարտվել ու կա մարդկանց մեծ տեղաշարժ»։

Источник: https://ipress.am/hy/page/%D5%BE%D5%AB%D6%80%D5%B8%D6%82%D5%BD%D5%A8-%D5%BD%D5%AF%D5%BD%D5%A5%D5%AC-%D5%A7-%D5%B3%D5%A1%D5%B4%D6%83%D5%B8%D6%80%D5%A4%D5%A5%D5%AC-%D5%B8%D6%82-%D5%B6%D5%B8%D6%80-%D5%A4%D5%A5%D5%BA%D6%84%D5%A5%D6%80%D5%AB-%D6%84%D5%A1%D5%B6%D5%A1%D5%AF%D5%A8-%D5%AF%D5%A1%D6%80%D5%B8%D5%B2-%D5%A7-%D5%AF%D5%BF%D6%80%D5%B8%D6%82%D5%AF?fbclid=IwY2xjawEvG35leHRuA2FlbQIxMQABHcsL44TOUa0WADSOwyh4hU-vq36Ds6Io6WWquTH5cLWRuTS2IEnJtt5kFg_aem_tix4bkRk7sKC7NUsYCnylQ