Թուրքիայի նախագահ Ռեջեփ Թայիփ Էրդողանը հրավիրվել է Եվրոպական քաղաքական համայնքի (ԵՔՀ) հանդիպմանը։ Այս կազմակերպությունը ստեղծվել է եվրոպական երկրների միջև ռազմավարական մերձեցմանը, համագործակցությանը, երկխոսությանը և համակարգմանը նպաստելու համար։ Հանդիպումը տեղի կունենա մայիսի 4-ին Հայաստանի մայրաքաղաք Երևանում։
«Կառուցելով ապագան. միասնություն և դիմակայունություն Եվրոպայում» խորագրով հանդիպումը համանախագահելու են Եվրոպական խորհրդի նախագահ Անտոնիու Կոշտան և Հայաստանի վարչապետ Նիկոլ Փաշինյանը։
Ինչպես նշվում է BBC-ի թուրքական ծառայության նյութում, հանդիպումը կազմակերպվում է խորը աշխարհաքաղաքական փոփոխությունների ժամանակաշրջանում, և դրա հիմնական թեմաներն են լինելու ժողովրդավարական դիմակայունության բարձրացումը, կապերի ամրապնդումը, ինչպես նաև տնտեսական և էներգետիկ անվտանգության հզորացումը։
Ընդգծվում է, որ Թուրքիան մասնակցել է առաջին գագաթնաժողովին, որը տեղի է ունեցել 2022 թվականի հոկտեմբերի 6-ին Պրահայում (Չեխիա)։ Էրդողանը նաև մասնակցել է 2024 թվականի նոյեմբերի 7-ին Բուդապեշտում (Հունգարիա) և 2025 թվականի մայիսի 16-ին Տիրանայում (Ալբանիա) կայացած հանդիպումներին։ Նշվում է, որ նրան հրավիրել են նաև 2023 թվականին Իսպանիայում և Մոլդովայում, 2024 թվականին Մեծ Բրիտանիայում և 2025 թվականին Դանիայում կայացած հանդիպումներին, սակայն նա դրանց չի մասնակցել։
Թուրքիայի կողմից դեռևս պաշտոնական հայտարարություն չի եղել այն մասին, թե արդյոք Էրդողանը կմասնակցի երևանյան հանդիպմանը։ «Դեռ վաղ է ասել՝ կմասնակցի՞ արդյոք Էրդողանը։ Մասնակիցների ցանկը դեռ վերջնականապես որոշված չէ։ Նրա մասնակցությունը կհստակեցվի առաջիկա օրերին», — հայտարարել է ԵՄ ներկայացուցիչը։
Ընդգծվում է, որ եթե Էրդողանը չմասնակցի երևանյան գագաթնաժողովին, ապա Թուրքիան դրան ներկայացված չի լինի, քանի որ կանոնների համաձայն՝ մասնակցել կարող են միայն պետությունների և կառավարությունների ղեկավարները։ Նախարարների կամ ավելի ցածր մակարդակով ներկայացվածությունը չի թույլատրվում։
BBC-ն շեշտում է, որ այս հանդիպումն ուշագրավ է նրանով, որ անցկացվում է Թուրքիայի և Հայաստանի միջև հարաբերությունների կարգավորմանն ուղղված քայլերի ֆոնին։ Եվրամիությունը, որն աջակցում է երկու երկրների միջև հարաբերությունների լիակատար կարգավորմանը, գտնում է, որ «հայ-թուրքական կարգավորման գործընթացի կայուն ընթացքն արտացոլում է տարածաշրջանում արմատավորվող ավելի լայն դրական դինամիկան»։ Ըստ ԵՄ-ի՝ այս դինամիկան կենսական նշանակություն ունի երկարատև խաղաղության և կայունության համար։
No Comment! Be the first one.