10-ամյա Արմանն արդեն երկու ամիս է՝ չի քայլում, մոր՝ Սուսաննայի օգնությամբ է միայն կարողանում տեղաշարժվել։ NEWS.am–ի հետ զրույցում Սուսաննա Սարկիսովան պատմում է՝ 2020 թվականի նոյեմբերի 9-ին ամուսինն է մահացել, որ որպես ռազմական բժիշկ դիրքեր էր բարձրացել վիրավոր զինվորներին օգնության հասնելու։ Ամիսներ անց էլ որդու՝ Արմանի մոտ ախտորոշվել է Դյուշենի մկանային անբավարարություն։
«Սկսեց դժվարությամբ բարձրանալ աստիճաններով, դա նկատեցի, գնացինք ստուգման։ Մեզ ասացին, որ մկանային հիվանդություն է, մենք անգամ չգիտեինք՝ դա ինչ է»,–ասում է նա։
Չորս տարվա ընթացքում տղայի առողջական վիճակն ավելի է վատացել, եթե սկզբնական շրջանում միայն թուլություն էր զգում, այսօր արդեն չի կարողանում քայլել, մի քանի տարի անց էլ սիրտթոքային անբավարարություն կարող է առաջանալ։ Այս տարիների ընթացքում չծեծված դռներ չեն մնացել, անգամ կառավարություն են հասել, սակայն ապարդյուն։
«Նամակ եմ գրել կառավարությանը, ուղարկել եմ Արմանի հետազոտությունների արդյունքները, ամուսնուս մեդալները։ Նամակը հասցեագրել են Առողջապահության նախարարությանն ու այլևս պատասխան չենք ստացել»,–պատմում է Սուսաննա Սարկիսովան։
Արմանի մորեղբոր՝ Վլադիմիր Գասպարյանի խոսքով, Հայաստանում ասել են, որ հիվանդությունն անբուժելի է։ Տղայի հարազատները սակայն, պարբերաբար հետևել են աշխարհում այդ հիվանդության բուժման նորարարական եղանակներին ու իմացել, որ 2023 թվականին ԱՄՆ–ում դեղամիջոց է ստեղծվել, որի արժեքը 3 մլն 200 հազար դոլար է։ Քանի որ գումարը շատ մեծ է, և այն հավաքելը դժվար կլինի, փորձում են ԱՄՆ–ի համալսարաններից մեկում իրականացվող հետազոտություններից մեկի ծրագրում ներառել Արմանին, և գոնե մի քանի տարով դադարեցնել հիվանդության զարգացումը։ Սակայն, ասում են՝ չգիտեն՝ ինչից սկսել, ում դիմել։
