Մի գիշեր Թաիլանդի և Մյանմայի սահմանը հսկող սահմանապահները կասկածելի ճիչեր են լսել։ Ձայնը լսվելիս է եղել կարծես ընդհատակից և որոշ ժամանակ փնտրելուց հետո սահմանապահները ջրհոր են գտել, հայտնում է noodou.com-ը։ Հենց այդ ջրհորում՝ 12 մետր խորության վրա, սահմանապահները հայտնաբերել են տղամարդու, ով հուսահատ օգնություն կանչելիս է եղել։ Փրկված տղամարդը ուժասպառ է եղել՝ բազմաթիվ կապտուկներով և ընկնելու հետևանքով կոտրված դաստակով, նրա բախտը բերել է այնքանով, որ ջրհորը չորացած է եղել։ Վերջինիս, մինչև հիվանդանոց տեղափոխելը, տեղում բուժօգնություն են տրամադրել։
Ոստիկանները լքված ջրհորը ծածկել են կափարիչով և սկսել են հարցաքննել մոտակա գյուղի բնակիչներին։ Պարզվել է, որ գյուղացիները երեք օր շարունակ ջրհորից ճիչեր են լսել։ Դրանք հատկապես գիշերները անհանգստացրել են բոլորին, սակայն սնահավատ մարդիկ որոշել են, որ ջրհորի մեջ բնակություն է հաստատել անհանգիստ ուրվական, և այդ պատճառով նրանք վախից չեն համարձակվել գնալ և ստուգել, թե ով է այդքան հուսահատ գոռում։
